Sorkar laipuiin TN ṭanpui inhuam

Union Finance Minister Arun Jaitley-a chuan thlipui Cyclone Vardah tuartu, Tamil Nadu ṭanpui turin sorkar laipui chu a inhuam reng tih a sawi.

Thawhṭanni tlai khan cylcone Vardah hian Tamil Nadu nuaiin, chhiatna nasa tak a thlen a ni. Thlipui tlehin chhiatna a thlen vang hian mi 10 an thi a, thingkung sing chuang a tluk bakah, power line tam tak a chhe bawk. Bawk te 7,000 chuang chu thlipui hian a len chhe bawk a ni.

Tamil Nadu sorkar chuan thlipuiin an state-a chhiatna a thlente din thar tur leh, chhiatna tawkte chhawmdawl hna thawhna turin sorkar laipuiah cheng vaibelchhe 1,000 a dil. State sorkar dilna hi sorkar laipui chuan a la ngaihtuah dawn a ni.

Jaitley-a chuan nimina Rajya Sabha inkhawma thu a sawiah, Tamil Nadu sorkarin chhiatna nasa tak a tawk chu sorkar laipui chuan a tawrhpui tih a sawi a, ṭanpui hna thawh dan tura member-teín rawtna an siamte pawh an ngaihtuah tur thu a sawi.

Congress party hruaitu P. Chidambaram chuan Tamil Nadu tan chhawmdawlna sum pe turin sorkar laipui hi a ngensak a, ìState sorkarin sum lama
ṭanpui tura a ngenna chu sorkar laipui chuan a chhang ngei tur a ni. Prime Minister leh Finance Minister-te chuan hemi chungcahng hi vawiinah ngei sawidun se la, thlipui tuartu state tana ṭanpuina an pek tur hi puang thuai rawh seî, a ti.

Thlipui tuarte ṭanpui leh chhawm≠dawl hna thawk tura sorkar laipuiin National Disaster Relief Force (NDRF) a lo buatsaih lawk chu ṭha a tih thu a sawi a, hemi rual hian tih tur tam tak a la awm thu a sawi. ìTamil Nadu-a ATM leh bank hrang hrangte chu thuam chakin, mipuiten sum an lakchhuah zung zung theihna turin ngaihven rawh seî, tiin Finance Minister hlui Chidambaram chuan a sawi.