Ramchhung Lawrkhawm

Naupang zinga ruihhlo leh zu hluar zel veng turin hriattir

Supreme Court chuan naupang zinga ruihhlo leh zu hluar zel veng leh dang tura hma la turin sorkar laipui a hriattir a, thla ruk chhunga hma lak dan tur ruahmanna siam turin a ti.

Chief Justice TS Thakur leh Justice DY Chandrachud awmna bench chuan school naupang zingah zu in leh ruihhlo khawih an pung zel tih sawiin, a ngawl an vei hnuah ruihhlo zuar tura fuih an ni leh fo a ni, an ti. Sorkar laipui hnenah ramchhunga school hrang hranga naupang zinga zu leh damdawi ṭha lo hmangte zawngchhuak tura survey nei turin a hrilh a, zirlai naupangte chu zu leh ruihhlo hmansual ṭhat loh zia leh, a nghawng ṭhat loh dante zirtirna pek dante ngaihtuah turin a ti bawk.

LS-ah SC/ST List siamṭhatna tur bill pharh

Lok Sabha inkhawmah nimin khan Scheduled Castes (SC) to Scheduled Tribes (ST) siamṭhatna tur bill pharh a ni.

Constitution (Scheduled Castes and Scheduled Tribes) Orders (Amendment) Bill, 2016-ah hian Jharkhand-a Bhogta hnam chu SC aṭanga ST list-ah dah rawt a ni. Hei bakah hian Assam, Chhattisgarh, Jharkhand, Tamil Nadu leh Tripura-a hnam ṭhenkhat chu ST list-ah dah belh rawt a ni. Bill hi Tribal Affairs Minister Jual Oram-aín House-ah a pulut a ni.

‘Global Thinker’ atan Sushwam Swaraj thlang

International Foreign Policy magazine-in 2016 ëGlobal Thinkerí 15 a thlanchhuah zingah External Affairs Minister Sushma Swaraj-i a tel.

Global Thinker atana thlan chhuah zingah hian Hillary Clinton, Angela Merkel leh Justin Trudeau-te pawh an tel. Sushma Swaraj-i hian External Affairs Ministry a enkawl aṭang hian harsatna tawkte ṭanpui nan a thawk nasa hle a, social media lamah pawh rampawn lama India mi harsatna tawkte a puih nasat avangin a lar phah hle. Tunah hian a kal (kidney) thlaksak niin, Delhi-a AIIMS damdawi-inah a awm mek a ni.