Karnataka minister-in banna theh lut

Karnataka excise minister Hullappa Yamanappa Meti chu hmeichhe pakhat nen mipat hmeichhiat lam hawia mawi lo taka an lanna CD thehdarha vau a nih hnuah, nimin khan minister a nihna aṭanga ban dilna a theh lut

RTI activist Rajasekhar Molali chuan kum 71 mi, Meti hi taluk panchayat office-ah hmeichhe pakhat nen mawi lo taka an awmna video CD a neih thu sawiin, minister lakah hian action lak a nih loh chuan he CD hi thehdarhah a vau a ni.

Molali chuan minister lanna CD a neih thu a sawi hnu hian, minister thawhpui hnai tak pakhat chuan CD hi tlangzarh lo turin a vau tih a sawi bawk. Police-ah complaint thehlut mah se, thuneitu sang lamin an nawr vangin FIR pawh ziah sak a ni loh thu a sawi bawk.

Minister chuan an puhna chu thu dik lo a nih thu a sawi a, mahse a hmeichhe awmpui nia sawi hian local channel-a interview a neihah Meti hian mipat hmeichhiat lam hawiin a khawih niin a sawi thung.

Chief Minister Siddaramaiah leh Home Minister G Parameshwara-te chuan video hi a awm tak tak a nih chuan Meti hi minister a nihna aṭanga ban a nih tur thu an lo sawi tawh a ni.

Meti banna hi CM hian a pawm a nih chuan, minister ban tawh zinga senior ber a ni ang. Hemi hma hian education ministre Tanvir Sait chu Tippu Jayanthi festival an hman laiin porn site a lo en vangin BJP chuan bang turin an lo phut tawh bawk.