PM Narendra Modi-a’n France leh Slovakia a tlawh dawn

Prime minister Narendra Modi-a chuan kumin June 13 aṭanga June 19 chhung hian France leh Slovakia ram tlawhin a zin chhuak dawn tih Ministry of External Affairs (MEA) chuan Thawhlehni khan a puang. A zinnaah hian G7 Summit leh VivaTech summit-ah te a tel dawn a ni.

MEA thuchhuah chuan PM Modi-a hian June 13-14 chhungin France-a hmun pawimawh tak, Nice khawpui a tlawh dawn a, France president Emmanuel Macron nen inbiakna an nei ang. He inbiaknaah hian ram pahnih inkara 'Special Global Strategic Partnership' awm tawh sa thlirletna an nei ang a, ram pahniha startup leh sumdawng hruaitute fuan khawmna tur 'Bharat Innovates' pawh an hmanpui nghal ang.

Hemi hnu hian June 14-16 chhungin Slovakia ram a tlawh leh dawn a, Slovakia prime Minister Robert Fico-a sawmna anga kal tur a ni. Kum 1993-a Slovakia ramin zalenna a chan hnua India Prime Minister zinga an ram tlawh hmasak berna tur a ni bawk. Slovakia-ah hian prime minister Fico leh president Peter Pellegrini te a hmu dawn a; sumdawnna, motor siam chhuahna leh rel kawng lama thawh hona tihchak dan tur an sawi dun ang.

Zinkawng pathumna atan PM Modi hi France-ah bawk let lehin, June 16-17 chhunga Evian khawpuia G7 Summit neih turah a tel leh dawn a ni. He inkhawmpuiah hian khawvel hruaitu hrang hrang, US president Donald Trump te pawh tel tura beisei an ni a, khawvel hmasawnna tur leh Artificial Intelligence (AI) hman dan tur te an sawi ho dawn a ni.

A zin tawpna ber atan June 18-ah Paris khawpui tlawhin, Europe-a technology lam inkhawmpui lian ber 'VivaTech Summit'-ah a tel ang a, chumi hnuah France-a awm India khua leh tuite hmaah thu a sawi dawn tih MEA chuan a tarlang.