EU-in Russia laka hrekna siam tharah Indian Entity-te tel ve

European Union (EU) chuan Ukraine laka Russia-in beihpui a thlak chhunzawm zel avangin hrekna thar (21st sanctions package) an duan an tihchhuahah, Russia ralthuam leh drone siamna lama puitu nia hriat India ram chhunga hmunhma nei entity leh company-te chu an telh thar ve leh ta. He hremna thar siam hi tihfel a nih hmain EU member ram hrang hrangte'n an pawmpui phawt a ngai dawn thung.

European Commission president Ursula von der Leyen chuan tun ṭuma hremna hian energy sector, crypto, financial services leh sumdawnna kawng hrang hrang bakah sangha manna thlengin a huam dawn tih a sawi. EU hotu Kaja Kallas pawhin he hremna hi drone siamna leh ralthuam atana hman theih thil thawn chhuah khapna tur a nih thu leh, hemi hnuaiah hian China, Turkey, Kyrgyzstan, Kazakhstan, UAE leh India rama company hrang hrang 50 chuang an tel thu a tarlang.

Hremna hian Russia-in khawvel hmun hrang hranga an hman ṭhin lawng 'shadow fleet' 30 zet a tel thar leh a; Khawvel ram danga bank leh crypto platform 20 chuang, Russia ṭanpuia puh te pawh sumdawnna khap sak tur zingah hian an tel a ni. Hemi hma pawh hian EU chuan an hremna siam 19-na leh 20-naah India company hrang hrang pathum—Aerotrust Aviation, Ascend Aviation, leh Shree Enterprises-te chu Russia sipai thlawhtheihna khawl hmanga an ṭanpui vangin export restriction-ah a lo huam tir tawh a ni.