Lok Sabha-ah Citizenship (Amendment) Bill 2016 pawm

Union Cabinet chuan Bangladesh, Pakistan leh Afghanistan aṭanga India rama rawn lut, minority (Muslim ni lote) te India khua leh tui nihna pek theihna tur Citizenship Amendment Bill, 2016 chu nimin khan a pawm.

Nimin Lok Sabha inkhawmah hian Union Home Minister Rajnath Singh chuan Citizenship Bill chu chawhnu dar hnih pelh hretah a pharh a, mipuite duhdan humhimna tur a nih thu a sawi a, dan loa ramchhunga awmte lakah hmalak a nih dawn thu sawiin dan loa ramchhunga lutte chuan khua leh tui nihna an nei thei dawn lo tih a sawi. 

Hetiang hi ni mahse Congress leh Trinamool Congress Party(TMC) chuan nasa taka sawiselin House an chhuahsan a, mahse House chuan bill hi a pawm ta tho a ni.   

Lok Sabha-a Congress leader Mallikarjun Kharge chuan Bill chuan Assam Accord a zah lo hle tih a sawi a, Trinamool Congress hruaitu Saugata Roy chuan Bill chu secular taka kalpui a nih loh thu sawiin engvanga sakhaw hming tarlang bik nge an nih a zawt. TMC chuan bill chu ram inṭhendarhna tur a nih theih thu sawiin committee hnena thawnlet leh turin an ti bawk.

Shiv Sena MP Arvind Ganpat Sawant pawhin mawhphurtu leh stakeholder-te biak phawt nise tiin rawtna a thlen a, CPM MP Mohammed Salim pawhin Bill chu sawiselin sakhaw kaihhnawih vangin Bill chu pawm theih a ni lo tih a sawi. Salim chuan India ram chu a inṭhen mek nia a lan thu sawiin sakhuana vang chauhin khua leh tui nihna chu pek theih a ni lo, tiin a sawisel ve bawk. AIDUF MP Badruddin Ajmal pawhin Bill chu hnukkir turin nasa takin a ngiat bawk a ni.

Hetiang hi ni mah se Rajnath Singh chuan Citizenship Bill chu humin India ram pumah hman a ni dawn tih a sawi a, Bill chuan Assam mipuite duhdan a hum zawk dawn nia sawiin sorkar chuan hnam tlem zawkte chu a hum ngei dawn tih a sawi bawk. Sakhuana nen inkaihhnawihna a nei lo tih sawiin, Bill chungchangah thu dik lo a darh nasa hle niin a sawi bawk.

Rajnath Singh chuan Assam mipuite tihdan phung leh an ṭawngte bakah an culture-te chu sorkar laipui chuan a humhim sak dawn tih a sawi a ni. Citizenship Bill vanga phurrit awmte chu Assam chauh ni lo, rampumin an phur dawn niin a sawi a ni.