CBI vs CBI : SC-in sorkar thupek hnawl, Alok Verma dah let
Supreme Court chuan nimin khan sorkar laipuiin Central Bureau of Investigation (CBI) Director Alok Vermna a chawlh tirna chu hnawlin, CBI Director-ah a dah let.
Supreme Court chuan CBI direcor atana Verma a dah let rual hian, CBI hna thawhna chungchangah thutlukna lian tham erawh siam rih lo turin a ti nghal bawk. Selection committee in Central Vigilance Committee-in eirua Verma a puhna chungchanga chhuina zawhfel a nih hma chu thutlukna siam lo turin a ti a ni.
SC chuan sorkar laipuiin CBI director chu leave a laktir chungchangah, a thuneihna hmang thei loa tura hrek tur hian CBI Director thlantu leh ruattu, high-power committee remtihna telloa a tih theihna dan a awm lo a ni tih a sawi.
Court thutlukna hi Justices SK Kaul leh KM Joseph ten an puang a, Justice Sanjay Kishan Kaul chuan selection committee meeting chu kar khat chhunga koh a nih tur thu a sawi nghal bawk. Court chuan sorkar laipuiin agency interim chief atana senior IPS officer M Nageswara Rao a ruatna pawh a sut sak nghal bawk.
CBI director Alok Verma leh special director Rakesh Asthana te chu eiruk leh thil dik tawk lo tia inpuhtawnin vantlang hriatin an inbei tawn a, hemi hnu hian sorkar laipui chuan nikum October thla khan an pahnih hian chawlh a laktir ve ve a ni. Chawlh laktir an nih hnuah interim chief atan Nageswara Rao dah a ni a, ani hian Verma team ami officer eng emaw zat a transfer nghal bawk.
Union Finance Minister Arun Jaitley-a chuan sorkarin Alok Verma leave a laktir chu Central Vigilance Commission rawtna ang ti a nih thu a sawi. Officer pahnihte hi thil dik lo tia an inpuh tawn avang te, an chungthu dik taka chhui chian a nih theih nan te leh CBI zahawmna vawnhimna turin officer pahnihte hi chawlh tir an ngai a ni, a ti.
Eptu party te chuan SC-in CBI Director a dah let leh chu lawmawm an tih thu an sawi. Peoples Democratic Party (PDP) president Mehbooba Mufti-i chuan SC thutlukna siam chuan mipuite rilruah independent institution rinngamna a tuh thar leh a ni, a ti. Jammu and Kashmir chief minister hlui hian sorkar lai chu politics lama hlawkpui tuma investigative agency - Central Bureau of Investigation (CBI) leh National Investigation Agency (NIA) te a hman sual ṭhin chu tihtawp tawh turin a ti bawk.
Delhi Chief Minister leh Aam Aadmi Party convener Arvind Kejirwal chuan SC-in CBI director dah let chu PM dik lohzia thailanna a ni, a ti. PM Modi-a kaihhruai sorkar chuan ramchhung institution hrang hrang leh democracy a tichhe mek tih a sawi.
Congress pawhin Supreme Court thutlukna siam chu lawmawm a tih thu an sawiin, court thutlukna siam hian sorkar laipuiin dik lo taka thil a lo tih chu a hnawlsak ta a ni, a ti. Supreme Court rorelna chu sorkar laipui tan zirtirna pawimawh tak a nih thu a sawi bawk.