India leh Nepal-in rel kawng siam chungchang sawi ho

India leh Nepal chuan ram pahnih inrintawkna leh inzawmna tichiang zual tura rel kawng pawimawh tak tak siam hna thawk mekte thlir hona hun an hmang a, rel lama thawh dunna tihchak dan tur an sawi ho bawk. Inbiakna hi June 11 leh 12 khan Kathmandu-ah neih a ni a, rel kawng thar pawimawh tak tak siamna turte pawh an sawi tel a ni.

Kathmandu-a India Embassy-in a tarlan danin, ram pahnih aiawhte hian '10th Project Steering Committee' (PSC) leh '8-th Joint Working Group' (JWG) meeting neiin, India sorkar puihna hmanga siam, Jaynagar-Bijalpura-Bardibas leh Jogbani-Biratnagar inkar rel kawng, broad-gauge hna kal lai te an thlirlêt nghal.

Inbiaknaah hian Janakpur leh Ayodhya inkara mipui chuanna tur passenger train tlan ṭan tir dan tura kaihhruaina sawi ho a ni bawk. Janakpur hi Laldapa (Lord Ram) nupui Sita-i pianna hmun nia hriat a ni a, ram pahniha sakhaw mi tam tak an intlawh tawn ṭhinna a nih avangin he rel kawng hian inzawmna ṭha tak a siam belh dawn bawk.

Hemi bakah hian Raxaul leh Kathmandu inkalpawhna tur broad-gauge rel kawng atana 'Final Location Survey' (FLS) report te an thlir ho a, Nepal ram chhunga 'East-West Railway Link' atan India-in technical support a pek dan tur te pawh sawi ho a ni. He rel kawng tharte hian ram pahnih inkar sumdawnna leh mipui zin veivahna nasa takin a tih awlsam beisei a ni.