Oman-ah Indian lawngpu a thi

Oman rama Duqm Port-a chawl lailawk lawng lian 'MT Celestial' a thawktu India mi pakhat, Nishanth Uirthanathan (35) chu hriselna lama harsatna a neih thut vanga a thih thu Muscat-a India Embassy chuan a puang. Lawng chhunga a thih hma hian ni hnih chhung chu enkawlna mumal dawng loin a awm niin an tarlang.

Seamen’s Union (FSUI) tarlan danin, hnathawktu thi hi Tamil Nadu mi a ni a, June 8 khan a na ṭan tawh a, June 11 tlai lam khan a boral a ni. Hetih lai hian he bial chhunga harsatna leh venhimna thila kharkhipna a awm vangte, leh hmun hla tak aṭanga inbiak pawhnaah harsatna a awm avangin damdawi-ina hruai chhuah thuai an harsat phah nia hriat a ni bawk.

India Embassy chuan he thil thleng chungchangah hian lawng enkawltu company leh thuneitute nen an inbe mek a, a ruang hi India rama thawn haw thuai a nih theih nan hma an lak mek thu leh thihna tawkte chhungte chu an tuarpui hle thu an tarlang a ni.