India leh France-in 'Innovation Roadmap 2030' pawm

Prime Minister Narendra Modi leh France President Emmanuel Macron-a te chuan Pathianni khan France rama Nice khawpuiah inbiakna pawimawh tak neiin, ram pahnihte chuan hmasawnna thar thlen tur ‘Innovation Roadmap 2030’ an pawm a, hemi rual hian ‘Dialogue on Economic Security’ an din thar bawk. PM Modi hian France-a ‘Bharat Innovates’ technology conference a hmanpui rualin he bilateral meeting hi neih a ni.

Ram pahnih hruaitute hian tun hnaia an inlaichinna chu ‘Special Global Strategic Partnership’ a an hlankai hnu a an vawi khat inhmuhna a ni. Hmasawnna thar leh technology hman kawnga thawhhohna thui zawk an neih theih nan ‘Innovation Roadmap 2030’ hi an duang a ni. He inremna hnuaiah hian khawvel huapa Artificial Intelligence (AI) hmasawnna enkawl turin ‘Joint India-France AI Working Group’ din an remtih bakah, institution hrang hrang inkarah thawhhohna thuthlung 19 ngawt an ziak bawk.

India leh France-te hian ram hnih inkara sumdawnna tihlen nan hmalakna hrang hrang an thlir nawn a; kumin February thlaa an lo din tawh ‘India-EU Free Trade Agreement (FTA)’ chak zawka kalpui a nih theih nan hma lak an tum. Kum 5 chhunga ram pahnih inkara sumdawnna a let hnih a tihpun a nih theih nan ‘High-Level Mechanism’ siam an rel a, hei hian SME, rel kawng, leh thlawhtheihna siam thlengin a huam dawn a ni.

Sorkar thuchhuah tarlan danin, ‘Dialogue on Economic Security’ hnuaiah hian critical minerals, semiconductor, cyber security, leh energy lakna hnar te humhalh a, inrintawnna thuk zawk siam an tum a ni. Hei bakah India kutchhuak ‘UPI’ hmanga pawisa inthawn tawnna chu France khawpui hrang hrang leh airport hmunpuiah te hmanna zauh zél an tum a, kum 2030 thlengin France hian India zirlai 30,000 neih tlin an tum thu an tarlang bawk.