NEET UG re-exam hmain Telegram khap NTA in ngen

NEET-UG 2026 re-examination neih tur inpuahchahna kal chho mek zelin, National Testing Agency (NTA) chuan sorkar laipui chu Telegram messaging app hman khap tura a ngenna chu a pawmpui. He khapna hi June 22, 2026 thleng hman tura tih niin, exam thianghlim leh felfai taka neih a nih theihna tura ruahman a ni.

Ministry of Electronics and Information Technology (MeitY) chuan Information Technology Act, 2000-a Section 69A tlawhchhanin he khapna thupek hi a chhuah a ni. Exam hma chiaha 'paper leak' emaw, exam zawha thlalak leh thu thawn tawh hnu siamrem (edit) a, dawt anga thuthang dik lo thehdarhtu pawlte lakah he dan hi khauh taka lekkawh a ni dawn a ni.

NTA thuchhuah chuan, Telegram-a 'message-editing feature' pawh June 30, 2026 thleng India ram chhungah tihtawp a ni bawk dawn tih a tarlang. Hei hi thil sual ti ṭhin te'n exam zawh hnuah paper chu hun rei tak atanga put ru tawh anga lantir nan an hman ṭhin avanga khap ngai ta a nih thu an tarlang bawk.

Heti hian June 21-a NEET-UG re-exam hmachuan tur zirlai nuai telte tan dik taka exam kalpui a nih theih nan sorkar chuan hma a la a ni. Telegram hman theih rih loh tur hian zirlai tam tak tan harsatna siam dawn mah se, exam thianghlimna vawng nung turin thutlukna hi siam a ngai a ni, tiin NTA chuan a hmalaknate a sawifiah.