PM Modi-an G7 summit neih mekah inrintawnna pawimawh thu a sawi

Prime minister Narendra Modi chuan G7 summit France-a Evian-les-Bains khawpuia Outreach Session neih mekah Thawhlehni khan thu sawiin, ram hrang hrang inlaichinna leh thawhhona chu donor recipient-ah chauh ni loin inpumkhatna leh inthluktlanna nunpui kawngah a in nghah thu a sawi. Summit hman karlah hian PM Modi hian ram hrang hrang aiawh hruaitu rawn telte nen inkawmna hun a hmang nghal.

PM Modi chuan India chu khawvel inlaichinnaah 'humanity first' tih thupui kalpui reng ṭhin a ni tih sawiin, khawvel pum huap hmalakna hrang hrang—International Solar Alliance, Coalition for Disaster Resilient Infrastructure, Global Biofuel Alliance, Mission LiFe leh 'Ek Ped Maa Ke Naam' campaign-te chu India-in khawvel tana thil ṭha a tihna hrang hrangte an nih thu a tarlang. He a thlirna hi 'Vasudhaiva Kutumbakam' (Khawvel pum hi chhungkawkhat kan ni) tih aṭanga lo piang a nih thu a sawi.

Summit neih karlakah hian PM chuan ram hrang hrang hruaitute kawm nghalin thawh hona tur leh hma thar lakna tur chung changte an sawi nghal. UK prime minister Keir Starmer nen India-UK inremna ‘Vision 2035’ hnuaia hmasawnna hrang hrang thlir lêtin, free trade agreement (CEPA) hmang tangkaia sumdawnna leh inlaichinna tihchak zêl an duh thu an sawi. UAE president Sheikh Mohamed bin Zayed Al Nahyan nen West Asia biala muanna leh himna a awm theih nana inbiakna neih pawimawhzia sawiin, Strait of Hormuz a sumdawnna him taka a kal zêl theih dan tur an sawi bawk.

PM hian chuan Canada PM Mark Carney pawh inkawmna hun neih puiin, ram pahnihte inlaichinna tihchak nan kumin chhung ngeia Canada tlawh a tum thu leh free trade agreement (FTA) ziah hman an beisei thu an tarlang. He inbiaknaah hian sumdawnna, ramsa humhalh leh energy, technology, leh mipui leh mipui inlaichinna (people-to-people ties) tihhmasawn dante an sawidun.