NEET-UG re-exam tur vanga ban chungchangah Telegram court-ah zualko ve leh

NEET-UG 2026 June 21-a re-examination neih tur atana venhimna khauh taka kalpui a nih theih nan, sorkar laipui chuan messaging platform lian 'Telegram' chu India ram pumah June 22 thleng atan block lailawk a; sorkar laipui hmalaknaah hian lungawiloin Telegram chuan nimin khan Delhi High Court-ah thlenin, sorkar thutlukna hi hlih sak turin a ngen a, court chuan ngaihtuah zui a remtih sak a ni.

National Testing Agency (NTA) rawtna angin, Ministry of Electronics and Information Technology (MeitY) chuan IT Act, 2000 hnuaia Section 69A tlawhchhanin he block-na hi a siam a ni. June 21-a exam hma hian Telegram kaltlanga dawt hmanga exam zawhna leak thehdarha zirlai pawisa laksak tum 'cheating rackets' an tam tak vang hian, June 30 thleng atan Telegram 'message editing' feature pawh hman theih loh turin sorkarin a hreksak bawk.

Delhi High Court vacation bench, Justice Tejas Karia hmaah Telegram aiawh chuan he thubuai hi hmanhmawh taka ngaihtuah turin a thlen a, Court pawhin ngaihtuah a remti a ni. Telegram chuan an platform-a dawt thuthang leh NEET kaihhnawih hman loh tur link 900 chuang an lo paih tawh thu sawiin, India a mi mtd 150 chuangin an hman, pawimawh app hrek kher chu thil hriatthiamawm loh leh an dikna palzutna a nih thu an tarlang.

NTA chuan he hmalakna hi ram mipui tana thil pawimawh tak, exam thianghlim leh fel fai a awm theih nana thutlukna, hun tiam nei a nih thu sawiin, zirlaiten dawt thuthang an awih loh nan leh hmanraw dang hmanga dik lo taka thiltite ven an nih theih nan a pawimawh hle tih an tarlang thung.