Nepal Foreign Minister-in China tlawh

Nepal foreign minister Shisir Khanal chu ni li cham turin Nilaini khan China khawpui Beijing a thleng a, nimin khan Chian foriegn minister Wang Yi leh senior leader-te a kawm nghal.

Shisir Khanal hian China a tlawh hmain India pawh a lo tlawh tawh bawk a, Nepal chuan India leh China nena inzawmna ṭha tak neih a duh thu a sawi. Ram pahnihte hian an dah pawimawh hle tih sawiin, tuna inlaichinna an neih mekte pawh tihchak a, tun hma aiin thawh dunna thuk zawk neihpui an duh tih a tarlang. Nepal-ah hian kumin March thlaa inthlanpui an neihah, prime minister Balendra Shah kaihhruai Rastriya Swatantra Party (RSP) chuan sorkarna an siam a ni.

China foreign minister Wang nen chuan connectivity, border management, sumdawnna, technology transfer leh huang zawk zawka thawh dunna neih dan tur an sawi dun tih Khanal chuan a sawi. Nepal chuan one-China policy chu a thlawp thu leh, China duh loh zawng thil tihna tura Nepal ram leilung hman an remtih loh tur thu a sawi bawk. Hruaitu pahnihte hian Nepal leh China inkara Trans-Himalayan Multi-Dimensional Connectivity Network siam chungchang pawh an sawi dun bawk a ni. Railway project siam tura zirchianna hi China lamah chuan zawhfel a ni tawh a, Nepal lamah pawh tun thla tawpah chuan zawh hman beisei a ni bawk.