Parliamentary Panel-in Education atana sum hman tihsan ngen

Ram chhunga zirna sang zawk (higher education) atana sorkar laipui sum dah ṭhin a tlem nia hriat a nih avangin, Parliamentary Panel chuan National Education Policy (NEP) 2020-in a lo bituk tawh angin, zirna lama sum hman ṭhin hi ram chhung GDP aṭanga chhutin za zela paruk (6%) thlenga tisang turin sorkar laipui a ngen.

Parliamentary Standing Committee on Education, Women, Children, Youth and Sports, Rajya Sabha MP Digvijaya Singh-a kaihhruai chuan Thawhlehni khan an report hi Rajya Sabha Chairman hnenah an thehlut tawh a ni. Report-in a tarlan danin, kum 2025-26 atana Higher Education Department budget tura ruahman, Budget Estimates a pung tlem lutuk chu pawi an tih thu leh, hei hian zirna in hmasawnna a tibahlah thei niin an sawi.

Committee chuan ramin pawisa hlutna hniam a hmachhawn mek te, zirna hmun hrang hranga hmasawnna kal mek tibuai lo tur leh sum hman tur tlahniam nasa zual tur laka ven nan kum tina zirna atana sum dah ṭhin hi 8%-10% vel talin a pung tur a ni tih an tarlang. Tun hnaia an sum hman chhuah tlem lutuk avang hian sorkar laipui chu hmalakna chak zawk nei turin an ngen.

Tarlan danin, kum 2021-22 chhung khan ram chhunga zirna zawng zawng atana sum hman ral hi GDP aṭanga chhutin 4.12% chauh a la ni a, hei hi NEP-in 6% a lo beisei nen chuan a inthlau hle thung. Hei bakah kum 2018 - 2023 inkar khan zirlai hming pe (Gross Enrolment Ratio) zat a ṭhang chak tawk lo hle a, kum 2035 thlenga NEP bituk zat tlin tur chuan sum hman hi tihsan ngei a ngai a ni. Sum dah tihpun hian tualchhung zirna in leh sorkar university-te tana infrastructure tihhmasawnna leh hna thar siamna kawngah nasa takin nghawng a neih beisei a ni bawk.