Farm Worker Union-in VB-G RAM G hlip turin nawrh huaihawt dawn

Sorkar laipuiin 'Viksit Bharat-Guarantee for Rozgar and Ajeevika Mission (Gramin)' (VB-G RAM G) dan thar a siam chu hlip tura phutin, July 1 aṭangin ram chhung hmun hrang hrangah lungawi lohna lantir a ni dawn. He nawrhna hi loneitu leh hna thawktu pawl hrang hrangte din 'NREGA Sangharsh Morcha' leh 'Joint Platform for Agricultural and Rural Workers' Unions' te hmalaknaa huaihawt tur a ni.

New Delhi-a thuthar lakhawmtute hnenah nawrh huaihawt tur hi puangin, sorkar hmalakna an duh loh thu an sawi. Sorkar chuan he hmalakna thar hnuaiah hian chhungkaw tina inhlawhna ni 100 ṭhin chu ni 125-ah tihpun a ni dawn tih sawi mah se, sum ruahman thar thlirin kum khatah ni 42 chauh inhlawhna siam sak theih a ni ang, tiin an hnawl. Pawl hruaitute chuan he dan thar hi an ṭhiah hma chu nawrhna hi an titawp dawn lo tih an sawi bawk.

Hruaitu zinga mi, Nikhil Dey chuan VB-G RAM G draft rules tharah hian state sorkarte chu a senso aṭanga 40% tum tura phut an nih thu a sawi a, hei hian state te zawk tan phurrit lian tak a siam dawn a ni, a ti. State lian zawk tum tur piah lamah hian sorkar laipuiin a thutiam anga inhlawhna, ni 125 siam turin sum a nei rih lo a ni, tiin an dem thu an sawi.

Pawl hrang hrangte hian Rural Development Ministry hnenah he dan thar hi ṭhiah a, a aiawha hna thawh theihna ngei 'NREGA' bawk dah leh turin an ngen dawn a ni. Tun hnaia sorkar laipui hmalakna hian hnathawktute chanvo a rahbeh sak nia hriat a nih avangin, thla thar aṭanga nawrh, lungawi lohna lantir tur chu thingtlang khaw tin deuh thawah uar taka kalpui a ni dawn a ni.