PM Modi hoin International Yoga Day hmang

International Yoga Day chu nimin khan khawvel ram hrang hrangah hman a ni. Prime minister Narenda Modi hoin Kolkata-a Red Road-ah hman a ni a, mi 35,000 vel an tel.

Kum 2014 September thla khan PM Modi chuan United Nations-ah June 21 chu International Yoga Day hman rawtna a thlen a, hemi kum December 11-ah UN chuan a rawtna hi a pawm a ni. He rawtna hi UN member ram 193 leh co-sponsor 173 in an thlawp a, kum 2015 aṭangin kumtin khawvel pumah International Yoga Day hi hman a ni zui ta a ni.

Kolkata-a Yoga Day an hmanah hian PM chuan he huna tel mipuite chu kawmin, ṭhenkhat chu an posture te a tihdik tir a ni. Kumin thupui atana hman, ‘Yoga for Healthy Ageing’ chungchang pawh sawiin, Modi chuan hmanlai aṭanga an lo tih ṭhin, yoga hian taksa leh rilru hriselna chawikanna atan leh, upat hnua la chak taka awm nan hmun pawimawh tak a luah a; nunphung a tiṭhain a ti hmasawn a ni, a ti.

Yoga hlawknate tarlangin, Prime Minister chuan, "Yoga hian kan taksa leh rilru chungchangah dam chhunga zir reng turin min zirtir a ni," tiin yoga hi hun bik chauhah ni lo, nunphung pakhatah nei turin mipuite a ngen.

President Droupadi Murmu pawhin Jabalpur-a International Yoga Day hmanna a telpui a, Madhya Pradesh governor Mangubhai Patel leh chief minister Mohan Yadav te pawh an tel. President Murmu chuan yoga chu India ram hnam nunphung aṭanga khawvel tana thilpek pawimawh tak a ni thu tarlangin, remna leh inlungrualna chawi larna atana a pawimawh thu a sawi.