Venhimna khauh tak hnuaiah NEET-UG 2026 re-exam nei

National Eligibility-cum-Entrance Test (NEET) UG-2026 re-examination chu nimin khan venhimna khauh tak hnuaiah centre hrang hrangah neiha ni. Exam beitu, candidate mtd 2.2 vel an awm.

National Testing Agency (NTA) in May 3-a exam a buatsaih chu question paper leak a awm avangin cancel a ni a, niminah exam hi buatsaih ṭhat leh a ni. Nimina exam hi chawhnu dar 2 aṭanga tlai dar 5.15 thleng neih niin, a hmaa exam hun aiin minute 15 pek belh an ni.

NEET-UG exam hi India ram chhunga khawpui hrang hranga centre 5,440 leh ram pawna centre 14-ah neih a ni. English leh Indian language 12 hmanga neih a ni a, examination room 95,000 chuangahte chuan CCTV dah vek an ni tih NTA chuan sawiin, CCTV camera hi 1,38,560 an hmang.

Exam ṭan hma hian union education minister Dharmendra Pradhan chaun zirlai exam turte chu hlauhthawnna engmah nei lo leh, rilru chiai loa exam hmachhawn turin a fuih. NTA, state sorkar, district thuneitute leh education lama hotu bakah zirlaite chu a ringtawk tih a sawi. Ṭha taka chhang turin zirlaite chu duhsakna a hlan.

Hetih lai hian NEET paper leak vangin Cockroach Janta Party (CJP) founder Abhijeet Dipke leh mi dang ṭhenkhat chuan nimin khan a ni hnihna atan Jantar Mantar-ah lungawi lohna an lantir chhunzawm a, education minister Pradhan chu bang turin an phut.