India-in Pakistan President thusawi hnawl

Pakistan president Asif Ali Zardari-a'n India rama Muslim sakhaw hmun hlui leh pawimawhte ṭhiah leh vau an nih thu leh, a ngaihtuah hle nia a sawi chu India chuan a hnawl. Ram chhung thil chungchang sawi turin Zardari hian chanvo a nei lo tih tarlangin, Pakistan ram chu mihring dikna chanvo palzut nasa tak ram a nih thu a sawi bawk.

Inrinni liam ta khan Pakistan President thusawi chungchangah hian Ministry of External Affairs thupuangtu, Randhir Jaiswal chuan thuchhuah a siam a, a thusawi chu thil ṭul lo tak a ni, a ti. India ram chhung thil chungchangah thu sawi turin chanvo engmah a nei lo tih a sawi.

Zardar hian X-ah India rama Muslim sakhaw hmun hlui te, Varanasi-a Masjid Ganj Shaheeda thlengin ṭhiahah vau an nia a hriat chungchang a tarlang a, hei hian a ngaihtuahna pawh a luah hle tih a sawi. India chu a thiltih bansan a, hnam leh sakhaw tlem zawkte dikna chanvo humhim sak leh, ram leh hnam rohlute vawng ṭha turin a ngen a ni.

Varanasi-a Masjid Ganj Shaheeda chu tun hnaiah Northern Railway-in an ram huam chhunga sak a nih thu sawiin, ṭhiat turin an lo ngen a, hei vang hian mosque management committee nen pawh an inkar a buai phah a ni. Muslim pawlte chuan mosque hi kum 1,000 dawn a ding tawh tih an sawi a, mahse hei erawh finfiahna a awm lo thung.