TN-a seafood factory-a gas leak vangin mi 7 thi

Tamil Nadu-a Thiruvallur district-a Manjangaranai hmuna seafood factory-ah ammonia gas put vangin mi pasarih an thi a, damdawi-ina enkawl ngai mi 60 chuang an awm bawk.

Chief minister Vijay chuan factory-a gas leak chungchang chhui chiang tur enquiry committee din turin thupek a tichhuak a, Director of Industrial Safety and Health, Member Secretary, Pollution Control Board leh Additional Director of Public Health awmna committee din nghal a ni. Anni hian thil awmdan chhuiin, darkar 24 chhungin interim report an pe ang a, ni 3-ah final report an tichhuak ang.

Gas leak vang hian factory-a hnathawkte chuan thawk lamah harsatna an tawk a, ṭhenkhat chu an lu haiin an luak bawk. Damdawi-inah hruai nghal niin, CM chuan harsatna tawkte chu enkawlna ṭha thei ang ber pe turin Thiruvallur bial changtu minister chu a hriattir. Gas leak hi measure valve aṭanga chhuak nia sawi a ni. He thil thlenga mawhphurtute laka hremna na tak lekkawh turin CM chuan a ti bawk. Factory-a thawk, gas leak vanga harsatna tawkte hi state pawn lam aṭanga inhlawhfa tura lut vek nia sawi an ni.