Modi-a thuneihna leh democracy palzutna paihthlak a ngai : Delhi CM

Delhi Chief Minister Arvind Kejriwal chuan nimin khan Narendra Modi sorkarin democracy palzut a, mimal thuneihna ang maia rorelna an kalpui chu na taka sawiselin, paihthlak a hun tawh tih a sawi.

Arvind Kejriwal chuan kum nga kalta chhunga politics-a Prime Minister eptute dinhmun chu theihnghilh lo turin mipuite a ngen. 

Kejriwal chuan a office hun hnuhnung lamah Modi-a kaihhruai sorkar chuan mawi lo takin CBI-te chu Akhilesh Yadav lakah hma a laktir nia sawiin, politics-a Modi-a dotute dinhmun chu theihnghilh chi a ni lo tih a sawi. Modi-a'n mimal rorelna a kalpui leh democracy a kalpuina chu paihthlak a hun tawh tak zet a ni, tiin a sawi. 

January 5 khan Central Bureau of Investigation chuan Delhi leh Uttar Pradesh-a hmun 14-ah beihpui thlakin, IAS officer hmeichhe pakhat chenna te, Samajwadi Party leader leh Bahujan Samaj Party member-te chenna te an dap a ni. Heng an dap te hi dan loa balu lak thubuai nena inzawmna neia ngaih vanga dap an ni. 

CBI hian Delhi-a sorkar minister-te office pawh 2015 aṭang khan vawi eng emaw zat an dap bawk.