Shiv Sena hotuin Constitution thlak danglam tumah BJP puh

Shiv Sena (UBT) hruaitu Aaditya Thackeray chuan nimin khan central-a rorellai, BJP chu Shiv Sena ṭhendarh tuma puhin, Parliament-ah an mamawh zat member an nih theih chuan ram danpui, Constitution chu siam danglam an tum a ni, a ti. Shiv Sena (UBT) MP zinga paruk chuan Shiv Sena phel lehlam, Eknath Shinde kaihhruai lam an zawm dawn nia report a awm a ni.

Nimina press conference a neihah, Thackeray chuan BJP chuan kum 2024 Lok Sabha-ah party mala majority a neih phak loh avangin, eptu party hrang hrangte chu tihchhiat a, tihdarh tumin a bei mek tih a sawi. "Ram danpui siam danglam an duh avangin kan MP leh MLA-te ṭhendarh an tum a ni. Kum 2024-ah voter-ten an thil tum hi an dansak a, MP 240 chauh neiin majority an nei pha lo. Mahse, tunah hian party dangte tihbuai tumin an bei leh mek a ni," a ti. An party MP hel, party dang zawm tum nia sawite chu ṭangrual pawl, Maha Vikas Aghadi (MVA) te ṭan hona avanga tling an ni tiin, anmahni thlang tlingtu mipui phatsanah a puh.