Ram temple saknaah dik lo takin Rs vbc 5,000 hman a ni : Congress President

All India Congress Committee (AICC) president Mallikarjun M. Kharge chuan Pathianni khan Ayodya, Uttar Pradesh-a Sri Ram Mandir saknaah dik lo takin Rs vbc 5,000 hman a ni tih a sawi. Temple chu pawisa ruk hmanga sak a ni tiin, thil dik lo tihnaa inhnamhanwihte chu chhui a, puangzar turin a phut.

Kharge chuan temple hi sum eiruk nana sak a ni, tiin L.K. Advani-a Rath Yatra hnu lama sum lakkhawmte kha tuman a hmanna fel takin an tarlang lo a ni, a ti. Temple sak zawh a nih hnuah Rs vbc 5,000 chu hman dik loh a ni tih a sawi a, report ṭhenkhat phei chuan temple enkawltu puithiamin sum hi a eiru nia tarlan a ni tih a sawi bawk. Prime minister Narendra Modi chuan temple-a milim te dahin a hawng a, ribbon te a chep chat a, hetih lai hian temple aṭangin sum tam tak rukbo a ni thung a ni, a ti.

Uttar Pradesh sorkar chuan June 13 khan Ayodhya Ram Temple tana sum thawh khawm, ruk leh dik lo taka hman nia sawi chungchang chhui turin member pathum awmna, Special Investigation Team (SIT) a lo din tawh a, SIT hian level hrang hrangah donation lut chinfel dan, thawktu enfiah, CCTV monitoring bakah sum thawhte trust office leh bank-a dah luh danah thil felfai tawk lo a awm tih pawh an sawi tawh bawk. Hnathawktu rawih dan leh hna thawh dan kalphungah pawh a dik tawk lo a awm tih an sawi a ni. Chhui hna hi an la thawk mek a, an zawh hunah final report hi chief minister Yogi Adityanath hnenah theh luh a ni ang.

SIT hian sum thawh khawm buaipui a ni dan bakah, temple sakna tura temple trust in ram a lei dan kaihhnawih leh a sakna tur hmanrua lei a nih dante pawh an chhui tel bawk a ni.