Vawiinah Citizenship Amendment Bill pharh dawn

Union Cabinet Thawhṭannia ṭhukhawm chuan Citizenship Amendment Bill chu Lok Sabha-a pharh a remti a, vawiin hian pharh a ni ang. 

Citizenship Amendment Bill hian ngaihven a hlawh hle a, dodalna a nasat avangin chai pawh a hlawh hle a ni. Lok Sabha-ah pawh hian pharh tura tih ni mah se sawiho theih a ni ang em tih chu ngaituah tham a tling a ni. 

He Bill hi Bangladesh, Afghanistan  leh Pakistan mi India-a cheng non-Musilim-te hnena khua leh tui nihna pek theihna tur a ni a, sawiselna erawh a nasa hle thung a ni. 

He bill hi kum 2016 khan pharh alo ni tawh a, mahse tun thengin pass a la ni lo. Joint Parliamentary Committee chuan he Bill hi a zirchian hnuah Lok Sabha-a pharh turin chawpchhuah a ni leh dawn a, Prime Minister Narendra Modi chuan tlang taka an ngaituah theih a beisei thu a sawi chuak a ni. 

Citizenship Amendment Bill hi hmarchhak state-te chuan an duh lo hle a, nasa takin dodalna an lantir a ni. Assam chu he Bill duhlohna lantir nasa ber an ni a, hmun hrang hrangah nawrh huaihawt a ni. 

Hmarchhaka zirlai pawl leh NGO hrang hrangte chuan he Bill duh lohna lantir hian vawiin aṭangin nawrh an huaihawt dawn a, darkar 11 a awh dawn a ni. Hemi hnu hian engtiangin nge an kalpui zui zel dawn tih hriat la ni lo mahse a tawp thlenga dodal an tum nia hriat a ni. 

Opposition party hrang hrang - Congress, Trinamool Congress, CPI-M leh party dang eng emaw zatin he Bill hi an thlawp loh thu an auchhuahpui tawh bawk. 

He Bill hi pass a nih chuan Bangladesh, Afghanistan leh Pakistan aṭanga India-a lo lut - Hindu, Sikh, Buddhist, Parsis leh Kristian sakhaw zuitute chu kum ruk an khawsak tlin chuan khua leh tui nihna pek theih an ni ang. Hei hian dociment felfai lote pawh a huam theih avangin dondalna hi a nasa zual hle a ni. 

Hetih lai hian BJP chuan kum 2014 inthlan khan he Bill hi a taka hman a nih theih nana hma lak an tiam a, tihlawhtling tur erawh chuan an hmabak a ko hle a ni.