JNU zirlai bo zawn nana uifing hmang turin hriattir

Delhi High Court chuan thla hnih dawn liamtaa chin hriat loha bo, Jawaharlal Nehru University (JNU) zirlai, Najeeb Ahmed zawng turin ui fing, sniffer dog hmang turin police-te a hriattir.

Justice GS Sistani leh Vinod Goel awmna bench chuan Delhi Police-te hnenah Ahmed-a zawnna kawngah hun khawhral belh tawh lo turin a ti. Ahmed hi chin hriat loha a bo hma niin zirlai ṭhenkhatin kut an thlak nia sawi a ni a, heng zirlaite statement lak hun hi tihkhawtlai a nih thu court chuan a sawi.

Court chuan JNU thuneitute leh zirlai pawl JNUSU hnenah, university campus dap tura hnialna an neih loh thu leh, police-te an theih anga an lo thawhpui tur thu an tarlanna chu ni hnih chhungah bench hnenah thehlut turin a hriattir bawk.

High Court chuan police-te chuan Jamia Millia Univeristy pawh an dap theih thu a sawi. Varsity thunetiute leh zirlaite aṭanga dodalna a awm a nih chuan court-ah phalna an la thei ang, a ti.