SC-in National Highway-a zu zawrh a khap dawn

Supreme Court chuan state hrang hranga National Highway dunga zu dawr awmte a khartir dawn.

Kawngpui dunga zu dawr awmte hi nakkum April 1 aṭangin tihtawp an ni tawh dawn a, licence pekte chu renew sak an ni tawh lo ang. Court chuan zu dawrte chu state leh national highway aṭanga meter 500 aia hnaiah a awm thei dawn tawh lo tih sawiin, zu fakna banner leh adverstisement-te pawh la thla vek turin a ti. He thupek hi state chief secretary leh police hotuten an kengkawh ang.

Kawngdunga chetsualna thleng avanga kumtin, mi nuai 1.5 chuang an thih ṭhin chungchang hi kar hmasa khan Supreme Court chuan a lo buaipui tawh a, national leh state highway dunga zu dawr awmte khar tir an nih mai theih thu pawh a lo sawi tawh a ni.

Nimin khan Chief Justice TS Thakur kaihhruai bench chuan National Highway-a zu dawrte kharna tur thupek hi a tichhuak ta a ni. Hemi rual hian Punjab sorkarin kawngpui bula zu dawr siam phalna leh ngaihnathiamna pe tura a dil chungchang chu na takin a sawisel zui a ni. Bench chuan, ìPunjab-in zu zawr phalna licence a pek chhuah tawh zat hi ngaihtuah rawh u. Zu lama sumdawnna hi a len em avangin in hlimpui a ni. Sum tam tak lakluhna atana in hman avangin excise department a hlim a, excise minister a hlim a, state sorkar pawh a hlim a ni. Mahse hemi avanga kawnga zu rui chunga motor khalh vanga thihna tawk an awmin cheng nuai khat emaw in pe ringawt ṭhin. Khawtlang ṭhatna leh ṭangkai tur zawk ngaihtuah rawh uî, tiin a sawi. State leh union territory-te chuan kawngpui dunga zu zawrh phalna pe tur a, sum lakluhna ṭha tih chu chhuanlamah an hmang tur a ni lo, a ti.

SC chuan kawngpui dunga zu dawr awmte titawp tura hma la ṭha tawk loah sorkar laipui pawh a puh bawk. ìSorkar laipui chuan national leh state highway-a zu dawr awmte chu tihtawp a ngaih thu tunah a sawi ve chauh a ni. Kum 10 kalta chhung khan eng thil mah a ti lo a, hei vang hian kan inrawlh a ngai ta a niî tiin bench chuan a tarlang.

Court hian sorkar laipui, state leh union territory-te chu kawngpui dunga zu zawrh tih tawp a nih theih nana excise law siamṭhatna tura rawtna an neihte thehlut turin a lo ti tawh bawk.