AIADMK hotu thar atan Sasikala Natarajan ruat

Tamil Nadu-a rorellai AIADMK chuan an party hotu, J Jayalalithaa-i a thih hnuah amah thlaktu atan a thawhpui hnai tak, Sasikala Natarajan-i chu ruat a nih thu official-in a puang ta.

December 5-a lung lam
ṭha lo avanga thi, Jaya-i a thih aṭanga kar hnih pawh a liam hmain a thlaktu tur hi tihfel a ni. AIADMK hotu thar tur, Natarajan-i hi kum 54 mi niin, party-ah nihna pawimawh chelh a nei lo. AIADMK thupuangtu, C Ponnaiyan chuan party hotu atana Natarajan-i dah tur hian a ṭul a nih chuan an dan hman mek pawh siamṭhat a nih mai tur thu a sawi a, party pumin hotu thar atan an duh a ni, a ti.

Jaya-i hi amah zuitute chuan Amma (mother) tiin an sawi ṭhin a, pasal nei loin Chennai-a Poes Garden-a bungalow lian takah a cheng a ni. A bulah Natarajan-i hi a cheng ve a, an party mite chuan Chinamma (mother younger sister), nute-i tiin an sawi ṭhin.

Party-ah nihna pawimawh la chelh ngai lo mah se, Natarajan-i thu leh hla hi Jay-i khan a ngaichang ṭhin hle nia sawi a ni a, inthlannaa party candidate thlanna kawngah pawh thu a nei pha hle nia sawi a ni bawk.

Kum li kalta khan Jaya-i leh Natarajan-i inkar hi a ṭha vak lo a, Jaya-i chuan a thuneihna paithlak tumin Natarajan-i chuan a pasal leh a chhungkhatte a thurualpui niin a ngai a ni. Mahse a hnuah an inkar boruak hi ṭha lehin, Natarajan-i chuan a chhungte chu thu≠rualpui tawh loh a tiam a ni.