Congress hruaituten PM an hmu

Congress vice president Rahul Gandhi-a hoin party hruaitute chuan nimin khan Prime Minister Narendra Modi an hmu.

PM Modi hmu tura kal, party hruai≠tute zingah hian leader Mallikarjuna Khrage, Ghulam Nabi Azad, Anand Sharma, Capt. Amrinder Singh, Raj Babbar-te an tel a, loneitute harsatna tawh mekte sawipuiin, Mang Patra (demand letter) an thehlut nghal a ni.

Rahul Gandhi chuan PM an hmuh hnua chanchinthar lakhawmtute a kawmnaah, ìRamchhunga loneitu hrang hrangte harsatna an tawh chung≠chang chu PM hi kan sawipui a ni. Harsatna avangin loneitu intihlum an pung zel a, Punjab-ah phei chuan nitin loneitu intihlum an awm. Sorkar laipuiin wheat-a import duty a titawp a, hei hian buaina nasa tak a thlen a ni. Loneitute hian an loan ba-te ngaihdam sak turin an duh a niî, a ti.

Uttar Pradesh-a Kisan Yatra a neih chungchang sawichhuakin, Rahul Gandhi chuan loneitute chuan thil phut pathum an nei a, loan ba an neih ngaihdam sak te, electric bill a man chanve-a tihhniam sak leh an thil tharchhuakte a man dik taka leisakte a ni tih a sawi. ì Congress kaihhruai UPA sorkarin loneitute loan ba, cheng vaibelchhe 140,000 hu a ngaihdamsak thu leh, PM chu hetianga ti ve tura kan duh thute kan hrilh a niî, a ti.

PM Modi chuan Congress palaite thil phut chu lo ngaihtuah a tiam nia sawi a ni bawk. Congress hruaitute hian nimin vek khan President Pranab Mukherjee hmuin, pawisa note tih thih vanga mipuiten harsatna an tawh chungchangte an sawipui bawk.