Zu khapna dan palzutte kum 10 thleng lung-in tan tir rawt

Gujarat sorkar chuan an state-a zu khapna dan khauh zawka kenkawh a nih theih nan, zu zuar, zu in leh zu zuarte lo ṭanpui ṭhin official-te chungah na taka action lakna tur dan siam a rawt.

Gujarat Prohibition Act hman mek siamṭhatna tur hi cabinet meeting chuan a pawm tawh a ni. Dan siam-
ṭhatah hian zu lei, hralh leh a semkualnaa inhnamhnawihte chu kum 10 thleng lung-in tantir leh, cheng nuai nga thleng chawi tir theihna tur siam a ni. Dan an hman mekah chuan zu khapna dan palzutte hi a rei berah kum thum lung-in tantir theih an ni.

Zu thlawrtu leh anmahni puitute pawh kum 10 thleng tantir theih an ni dawn bawk a, zu ruih vanga buaian siamte chu kum thum thleng tantir theih an ni ang a, a reilo berah kum khat tal tantir tur an ni.

Official zingah zu zuar leh thlawr lo puitute chu kum sarih thleng lung-in tantir leh, cheng nuai khat chin chawitir theih an ni bawk ang.

Minister of State for Home Pradeep≠singh Jadeja chuan dan thar siam hnuaiah zu semna atana hman motor an mante chu pek kir an ni tawh dawn lo tih a sawi.

State sorkar chuan November thla kan zu khapna dan an hman mek chu khauh zawka siamṭhat a lo tiam tawh a ni. Zu khapna dan khauh zawk siam phuta state Assembly-a nawrh huaihawt tumtu, OBC leader Alpesh Thakor pawhin sorkar a intiam hnuah a nawrh tum chu a ṭhulh nghal a ni.