HM kaihhruaiin NCORD meeting nei dawn

Ramchhunga ruihhlo hluar zel dona kawnga sorkar laipui hmalakna tihchangtlun dan ngaihtuahin vawiin hian New Delhi-ah Narco-Coordination Centre (NCORD) Apex-Level Meeting vawi 10-na neih a ni dawn a, union home minister Amit Shah-a'n a kaihruai ang. Ruihhlo dona kawnga hma lak dan tura ruahmanna, ‘Vision Document on Narcotics Control (2026-2029)’ chu a tlangzarh nghal ang.

Home Ministry chuan meeting hi Narcotics Control Bureau (NCB) hoa neih a ni dawn a, prime minister Narendra Modi-a’n ruihhlo awm lohna ram (Drug-free India) ni thei tura a duhthusam thlentirna tur kawnga hma lakna pawimawh tak a nih thu a tarlang. Meeting-ah hian Central Ministry leh Department 44 aiawhte leh state sorkar hrang hrang aiawhte chu a hmun leh online hmangin an tel dawn a ni.

‘Vision Document (2026-2029)’ hian ruihhlo lak luh tihtawp 'supply-reduction', ruihhlo mamawhna tihtlem 'demand-reduction' leh a nghawng ṭha lo tireh tur a hmalakna a huam dawn a ni. Tun laia ruihhlo thar hlauhawm tak synthetic drugs leh darknet hmanga ruihhlo tawlhruk hluar zel hmachhawn dan tur pawh ruahmanna tharah hian telh a ni a, ruihhlo ngaite tan hmunpui leh rehabilitation centre hrang hrang te pawh tihlen a ni ang.

Amit Shah chuan NCB Annual Report-2025 a tlangzarh tel dawn a, hei bakah Jammu leh Guwahati-a NCB Zonal Office thar sak zawh takte chu a rualin a hawng nghal ang. Hemi rual hian ruihhlo suatna hmalakna lian tak 'Online Drug Disposal Fortnight Campaign' chu neih chhunzawm a ni dawn a, he beihpui thlak chhung hian ramchhung hmun hrang hranga ruihhlo man tawh, Rs vbc 6,000 hu, kg 2,09,500 zet chu dan anga tihchhiat vek tum a ni.