India lawngte Strait of Hormuz-ah kaltlang phalsak

Directorate General of Shipping (DGS) chuan Persian Gulf chhehvel, a bik takin Strait of Hormuz-a India lawng liante kaltlang khapna leh khuahkhirhna lo tihchhuah tawh chu a hlip tih a puang.

Thupek tihchhuah tharah hian ram buai zualna biala India seafarer-te dah khapna pawh a hlip tel nghal bawk. Hetih rual hian he tuipui kawng paltlang sipaite leh a enkawltute erawh chu fimkhur chhunzawm a, venhimna thuchhuah hrang hrangte ngaichang reng turin sorkar chuan a hriattir thar bawk.

Sorkar thuchhuah tarlan danin, Persian Gulf chhehvela indona thil vanga June 13-a khapna lo siam tawh chu thlahdul a nih tak avangin, tualchhung thuneitute chuan venhimna dan leh inkaihhruaina an siamte ṭha taka zawm chungin lawng neitute leh hnathawktute chu he bialah hian hna an thawh chhunzawm leh phalsak an ni.

International Maritime Organisation (IMO) chuan United Kingdom Maritime Trade Operations (UKMTO) leh MICA Center te nen thawk hoin, he biala tangkhang lawnga hnathawkte chhanchhuah hna an lo thawk tawh a ni. Sorkar laipui pawhin Ministry of External Affairs leh Indian Navy te nen thawk hoin India khua leh tuite himna an ngaihven reng thu an sawi.