India leh Japan in annual summit nei dawn

India leh Japan ram hruaitute chu July thla tir lamah New Delhi-ah 16th India-Japan Annual Summit' an nei dawn a, sumdawnna leh inremna thar tam tak a hrin chhuah beisei a ni.

'Annual Summit' neih turah hian ram venhimna lam bakah, economic security, bungraw lakluh leh thawn chhuahna kawng 'supply chains' tihchak leh clean energy chungchangte thupuiah hman a ni dawn.

Japan prime minister Sanae Takaichi chu July 1-3 chhung India ramah rawn chamin, July 2 hian PM Modi nen inremna pawimawh tak tak an ziak dawn a ni. PM Takaichi-i’n Japan PM hna a chelh hnua India a rawn tlawh hmasakna ber tur a nih avangin ram pahnih inlaichinna atan a pawimawh hle dawn a ni.

Inbiaknaa neih tura ngaihpawimawh tur, ram pahnihte inkara 'economic security' chungchangah declaration siam a ni. Tunlaia khawvel politics inthlak danglam zel laka him nan leh an ram mamawh hrang hrang, a bik takin semiconductor, critical minerals leh damdawi hrang hrangte harsatna awm loa an inthawn tawn theih nan hma lak tum a ni. Ṭhutkhawmah hian clean energy chungchang pawhin hmun pawimawh a chang dawn a, hmasawnna thar 'biogas-powered mobility' chungchang sawi a ni ang. An hmalakna hian India chu rampawn aṭanga crude oil lak luh titlemin, ramchhunga khawl leh motor tlante tan hmanraw thianghlim leh tlawm zawk hman theihna kawng a sialsak thei dawn a ni.