Hmasawnna thlen tur scheme endikna tur portal thar tlangzarh

Union rural development minister Shivraj Singh Chouhan chuan Pathianni khan sorkar laipui hnuaia khawtlang hmasawnna atana scheme hrang hrang kalpui takte fiah leh fel fai zawk a nih theih nan 'Rural Internal Audit Portal' thar a tlangzarh. He portal thar hi Pusa Campus, New Delhi-a 'Rashtriya Gramin Vikas Sammelan' neihnaah a tlangzarh a ni.

He digital platform thar hi khawtlang hmasawnna scheme hrang hrang endikna atana siam a ni a, hna kalpui dan hrang hrangah fiah leh rintlak a awm theih nan a ṭanpui dawn a ni. Artificial Intelligence (AI) tlukpui hman a nih bakah, National Informatics Centre (NIC) leh Office of the Chief Controller of Accounts (CCA) te ṭangdunin an duan a ni bawk.

Union minister Chouhan chuan khawtlang hmasawnna hnaah khawl hman leh muster roll dik lo siam a, inbumna leh sum hman dik loh a awm ṭhin chu pawi a tih thu a sawiin, tunah hian MGNREGA thlakna tur 'Viksit Bharat - Guarantee for Rozgar and Ajeevika Mission (Gramin)' chu July 1 aṭanga hman ṭan a nih tur thu a sawi. He scheme hnuaia inhlawh theih ni zat pawh ni 100 aṭanga 125-ah tihpun a nih tur thu a sawi bawk a ni.

Portal thar hian sum hman dante fiah takin a tarlang dawn a, hmasawnna hnathawh dante pawh a enzui zung zung theih dawn a ni. Tunah hian khawtlang tana scheme pawimawh zual - PMAY-G, NRLM, leh PMGSY ahte hman nghal tur a nih bakah, finance ministry lamin civil ministry hrang hrang tana hman zui ve pawh an remti tawh bawk.