Rajya Sabha MP thlan thar 8 te la lut

Rajya Sabha MP thlan tlin thar mi pariatte chu nimin khan rinawmna thu tiamtir lak luh an ni. MP lak luh thar zingah hian Congress president Mallikarjun Kharge leh BJP hruaitu Tarun Chugh pawh an tel. Thutiam lakna hun hi Rajya Sabha chairman leh vice president C.P. Radhakrishnan chuan a kaihruai a ni.

Mallikarjun Kharge hian Chairman pisaah thu tiamna hun hi a hrangin a nei a, he hunah hian Constitution bu kengin Hindi ṭawngin rinawmna thu hi a tiam a ni. Kharge thutiam lai hian Congress Parliamentary Party chairperson Sonia Gandhi leh MP Priyanka Gandhi Vadra te pawh an tel. Member dang pasarih te erawh chuan Rajya Sabha chamber-ah rinawmna thutiam hi an la thung.

MP lak luh tharte hi BJP aṭangin paruk, Congress aṭangin pakhat leh NCP aṭangin pakhat an ni. Gujarat aṭangin Jitendra Meghjibhai Kanzariya leh Mansingh Meraman Parmar; Karnataka aṭangin M. Nagaraja, Maharashtra aṭangin Rajendra Hiralal Jain (NCP), Manipur aṭangin Adhikarimayum Sharda Devi leh Rajasthan aṭangin Alka Singh te an ni.

Hun hmanah hian Rajya Sabha deputy chairman Harivansh, Leader of the House J.P. Nadda, parliamentary affairs minister Kiren Rijiju leh law minister Arjun Ram Meghwal te pawh an tel a, Chairman Radhakrishnan chuan MP thar te hi lawmpuina chibai a buk nghal bawk.