Seychelles Independence Day-ah Indian Army an tel

Seychelles ram zalenna kum 50-na, Golden Jubilee lawmna nimin June 29-a neihah Indian Army contingent-te chu an tel ve. He hun hmanah hian prime minister Narendra Modi chuan 'Guest of Honour' niin a telpui bawk.

I-Day lawmna huna tel Indian Army contingent hi Assam Regiment aṭanga thlan chhuah, sipai 32 an ni a, Captain Aryan H. Deolekar-a’n a kaihruai a ni. Indian Navy marching contingent leh an military band-te pawh an tel a, hei hian ram pahnihte inkara venhimna kawnga thawh dunna thuk tak an neih a tarlang a ni.

India leh Seychelles-te hi ṭhianṭha ram niin kum tak tam thawh dunna an lo nei tawh a, tun hnaiah phei chuan ram venhimna, hmasawnna hna thawh, nun phung leh sumdawnna hmun thlengin thawh dunna huang an zauh tawh. An ram tana hun pawimawh tak lawmna buatsaiha India sipaite tel hian ram pahnih inkara inrin tawnna leh inunauna a tinghet zual hle tura ngaih a ni bawk.

Seychelles National Day lawmna hmanpui tura an ram president Patrick Herminie sawmna angin kar liam ta Inrinni khan PM Modi chuan Seychelles hi a thleng a ni. External affairs minister S Jaishankar leh national security advisor Ajit Doval te pawh an tel a ni. Special ceremony buatsaihah, president Herminie chuan Modi chu ram ṭhang mekte hmasawnna tura a thawhna te,leilung humhalhna kawnga hruaitu ṭha tak a nih vang te leh tuipui hausakna, blue economy chawikanna atana a thawhna avangin chawimawina, Guardian of the Blue Horizon a hlan a ni.