IWT chungchangah Pakistan Minister-in India vaukhan

Indus Waters Treaty (IWT) chungchanga India leh Pakistan boruak a so san chhoh zel karah Pakistan climate change Minister Musadik Malik chuan India chu vaukhanin, Pakistan chan tur tui lakpensak tura hma la apiang chu na taka beih let an nih dawn thu a sawi.

Pakistan information minister Attaullah Tarar nena Nilainia thuthar lakhawmtute an kawmnaah Malik chuan he thu hi a sawi a ni. Nikuma Pahalgam-a firfiakte chet na rapthlak a thlen hnu khan India chuan kum 1960-a tui insemna tura inremna neih tawh chu a hreng zui a, hei hian Pakistan-ah tui tlakchham hlauhna nasa tak a thlen mek a ni.

Musadik Malik chuan, "Kan tui chanvo khawih chhe tura tupawh an lo che a nih chuan, an kut kan sah thlak sak ngei ang," tiin a sawi. India Prime Minister-in tui far khat pawh Pakistan lama luan luh tir loh a tum chu an hriatpui thu sawiin, tui hi ram pahnih inremna khawvel hriatpuina hnuaia siam a nih avangin pawl lehlam chauhin a tihtawp ngawt theih a nih loh thu a sawi bawk.

Hetih lai hian, Pakistan information minister Tarar pawhin Indus Waters Treaty chu dan anga hman a la nih reng thu leh, khawvel hmun hrang hrang lakah pawh Pakistan hian thlawpna a hmuh zawk thu a sawi ve. Pakistan ram mipui tam zawk hi lo neih hmanga intodelh an nih avangin tui hrek sak chu an economy in a tawrhna tur a ni, tiin an dem thu an tarlang.