General Dhiraj Seth-an Army Chief hna chelh ṭan

India sipai chawmawina hrang hrang Param Vishisht Seva Medal(PVSM), Uttam Yudh Seva Medal(UYSM), Ati Vishisht Seva Medal(AVSM) pawh lo dawng tawhtu, General Dhiraj Seth chuan Thawhlehni khan India rama sipai chak ber, Indian Army hotu lu ber 31st Chief of the Army Staff mawhphurhna a la ṭan. General Seth hian hemi hma hian Vice Chief of the Army Staff hna a lo chelh tawh a ni.

Army Chief General Upendra Dwivedi, PVSM, AVSM chu ram tana kum 40 chuang rinawm taka a thawh hnuin nimin khan pension-in a chhuak a, General Seth hian a thlak a; kum 2028, August thleng he hna hi a chelh ang.

General Seth hian Desert Sector-a Armoured Regiment te, Jammu & Kashmir-a Counter-Insurgency Force te leh Sudarshan Chakra Corps te a lo ho tawh ṭhin a ni. Sipai hotu lian, Army Commander a nih chhoh hnuin South Western Command leh Southern Command te a lo enkawl tawh bawk.

Sipai inrelbawlna lama thiamna leh hriatna thuk tak nei, General Dhiraj Seth hi tun thlenga India sipaite chet dan thlak danglam hna thawh kawngah pawh sulsutu langsar tak a ni. Khawvel thiamna thar mila sipaite hmabak chhawp chhuah kawngah pawh a lakah ram hruaituten beiseina sâng tak an nei a ni.