BJP hruaituin deputy PM-ah Nitin Gadkari dah phut

BJP veteran leader leh union minister hlui Sanghpriya Gautam chuan Union Minister Nitin Gadkari chu deputy Prime Minister a dah a phut a, hemi rual hian Union Home Minister Rajnath Singh chu Uttar Pradesh Chief Minister-ah dah a duh thu a sawi bawk. 

Gautam chuan an party president nilai, Amit Shah chuan Rajya Sabha-ah majority an neih theihna turin nasa zawkin thawk se a duh tih a sawi a, party president-ah Madhya Pradesh Chief Minister Shivraj Singh Chauhan dah a nih theih nan kawng hawn sak turin a ti. 

BJP hruaitu hlun hian a thil phut hrang hrangte hi a lehkha thawnah ziakin, heihi media mite hnenah a pe a ni.

A lehkha thawnah Gautam hian UP CM nilai Yogi Adityanath chu sakhaw lam hna thawhtir zawk turin a ti bawk. 

Prime Minister Narendra Modi chu ram hruaitu lu ni tawh zingah langsar ber pawl ni mah se, 2019 Lok Sabha inthlanpui neih turah 'Modi wave' chu a awm chhunzawm loh a hlauhawm hle tih a sawi. "Modi Magic hi inthlanpui neih turah hian a thawh chhunzawm tawh hmel loh hle a, hei hi party worker-te pawhin a rukin an pawm a, a rukin an tuar mek a ni",  a ti.