Rahul-an Rafale deal chungchang zawtfiah turin mipuite fuih
Congress president Rahul Gandhi chuan India ram mipuite chu sorkar laipui leh France-in Rafale fighter jet leina tura inremna an siam dan chungchang Prime Minister Narendra Modi leh a minister-te zawtfiah turin a phut.
Rahul Gandhi chuan Rafale deal chungchang hi Defence Minister Nirmala Sitharaman-i chuan Parliament-ah darkar hnih chhung zet a sawi a, mahse inremna siam a nih danah zawhna awlsam tak pahnih a zawh chu a chhang thei lo a ni, tiin a twitter-ah a tarlang. Parliament-a defence minister hnena zawhna pahnih a zawt lai video pawh a dah tel bawk.
Gandhi hian tuin nge Anil Ambani hnenah offset contract pe tih leh, prime minister-in inremna siam dan tur chungchang a enfiahlai chuan defence ministry official lam aṭangin lo dodalna a awm em tih a zawt a ni. Defence minister hnenah hian a zawhnate hi 'aw' leh 'aih' tih chauh pawha chhang turin a ti a, mahse minister hian a chhang lo a ni.
Congress chuan France aviation company hnen aṭanga aircraft 36 leina tura inremna siam danah thil fel tawk lo a awm tih an sawi a, PM Modi-a kaihhruai sorkar chuan sorkar hmasa, Congress kaihhruai UPA in aircraft man tura inbiakna an lo neihpui tawh man aia sang daihin lei a tum tih a sawi a ni. Hei bakah hian NDA sorkar chu he inremna siamnaah hian Anil Ambani-a firm chu duhsakna lantirah a puh bawk.
Rahul Gandhi leh Congress party senior leader Randeep Surjewala-te chuan Defence Minister Sitharaman-i chu Hindustan Aeronautics Limited (HAL) hnena cheng vaibelchhe nuai tel order pek chungchangah dawt a sawi niin an sawi. Defence manufacturer hian order pakhat pawh an dawn loh thu leh, an hnathawktute hlawh pekna tur pawh loan an lak zawk thu Surjewala chuan a sawi a, defence minister chu sorkar order siamna document chu Parliament-a pharh turina phut a, a ngam lo a nih chuan minister a nihna aṭanga bang turin a phut.
Zirtawpni-a Parliament-a Rafale deal chungchang sawihonaah, Defence minister hian HAL hnenah contract ṭha tawk tak, cheng vaibelchhe nuai khat hu an pek thu a sawi a ni. Mahse hemi hnu lawk hian media report chuan HAL hi sum lamah a tlachhe hle a, hnathawktute hlawh pek tur pawh a puk chawp a ngai hial niin an tarlang a ni. Hei bakah hian HAL hnenah order engmah siam a la ni lo niin an sawi bawk.