Court-in Vijya Mallya, fugitive economic offender-ah puang

Mumbai court chuan kar kalta Inrinni khan bank loan ba cheng vaibelchhe 9,000 chuang neia UK-a tlanchhe mek, sumdawng lian Vijya Mallya chu fugitive economic offender-ah a puang. 

Kum 2018 August thla aṭanga hman ṭan, Fugitive Economic Offenders Act hnuaiah Mallya hi sumdawng zinga thubuai siamsak hmasa ber a ni. He dan hmang hian fugitive offender-a puangte thil neih, khawih chet leh khawih chet theih lohte chu laksak theih an ni dawn  a ni. 

Fugitive economic offender hi cheng vaibelchhe 100 leh a chunglam tichingpentu, man leh thubuai hmachhawn hlauh vanga ram danga tlanchhia an ni. Mallya hian court-in fugitive economic offender-a a puanna hi High Court-ah a khing let thei ang. 

Vijya Mallya hi a sum batna, bank intelkhawmten Supreme Court-ah an thlen hma lawkin, kum 2016 khan India ram chhuahsanin UK-ah a tlanchhia a ni. Tunah hian bail-a chhuah mek a ni a, thuneituten India rama thawn tura UK thuneitute an ngenna London court chuan a remtihsak tawh a ni.