UP-ah Congress telloin SP-BSP thawk dun dawn

7th January, 2019

Bahujan Samaj Party (BSP) leh Samajwadi Party (SP) chuan Lok Sabha inthlanpui awm turah Uttar Pradesh-ah Congress party telloa thawh dun an tum.

Party pahnihte hian Uttar Pradesh-a Lok Sabha seat chu inzata insem an remti a, hemi rual hian Congress hruaitu Rahul Gandhi leh Sonia Gandhi-te bial, Amethi leh Rae Bareli-ah erawh candidate dah an tum lo. Jat leader Ajit Singh-a party RLD tan seat ṭhenkhat an kian dawn bawk. UP hian Lok Sabha seat 80 a nei a, SP leh BSP hian seat 37 ve vein insem an tum a ni.

Seat insem dan tur chungchang hi relfel tawh mah se official-in an la puangzar lo a, BSP hotu Mayawati-i piancham, January 15-ah an puang dawn nia sawi a ni. Hemi ni hi SP hotu, Akhilesh Yadav-a nupui Dimple Yadav-i piancham a ni bawk a, hei vang hian party pahnihte hian he ni hi an party thawhdunna puanchhuahna atan an duh ve ve nia sawi a ni.