Parliament Monsoon Session July 20-ah ṭan dawn

Ram rorelna sang Parliament Monsoon Session chu July 20 aṭangin neih a ni dawn a, kar thum chhung a awh beisei a nih thu official-te chuan Thawhlehni khan an puang. Hetih lai hian Cabinet Committee on Parliamentary Affairs (CCPA) chuan session neih tura hun hman dan tur erawh an la siam fel lo.

Parliament Monsoon leh Winter session-te hi chawlhkar li chhung awh tura ruahman ṭhin a ni a, ṭhutkhawm vawi 20 vel an nei ṭhin; mahse, a aia tlem neih chang pawh a awm tawh ṭhin bawk. Kumin hian state eng emaw zatah assembly inthlan neih niin, central-a rorel lai BJP ten West Bengal, Assam leh Puducherry-a hnehna an chan hnu lawk a nih avangin, House lamah pawh BJP an inringtawk hle tura rin a ni.

Session lo awm turah hianTrinamool Congress (TMC) MP 20 leh Shiv Sena (UBT) MP parukten group hrang anga awm an dilna chungchangah Lok Sabha Speaker Om Birla chuan thutlukna a la siam lo. Rajya Sabha-ah MP thlan thar lak luh an ni dawn a, rorella BJP kaihhruai NDA dinhmun pawh a ngheh phah sauh dawn a ni.

Sorkar laipui chuan session hmasaa bill tlang zo ta lo, Women’s Reservation leh Lok Sabha seat tihpunna tur ‘Constitution Amendment Bill’ chu her rem lehin, he session-ah hian pharh leh tum a ni bawk.