Indo-Pacific chungchang sawi dun turin Japan PM a lo thleng

Japan prime minister Sanae Takaichi chu nimin khan PM a nih hnua a vawi khatna turin India a rawn thleng. A cham chhungin India leh Japan-in Indo-Pacific biala thawh dunna tihchak dan te, critical technology leh economic security chungchangah inbiakna, '20th Annual Summit' neih a ni ang.

Persian Gulf biala buaina thleng mek lakah ram pahnihte hian an thawh dunna tihchak an mamawh hle a, India chu Japan thil tum ‘Free and Open Indo-Pacific’ (FOIP) hlawhtlinna tur atana ram pawimawh tak a ni.

Annual summit-ah hian prime minister Narendra Modi leh PM Takaichi te chuan economic safety cooperation bakah Artificial Intelligence (AI) chungchangah joint declaration an siam dawn a, thawh dunna tur inremna thuthlung (MoU) eng emaw zat an ziak fel tura ngaih a ni bawk.

Sawi dun tur pawimawh dang zingah ram pahnih inkara sumdawnna leh hmasawnna hna thar, Next Gen Mobility Partnership te, Odisha-a Japan puihnaa kalpui tur ‘Green Ammonia Project’ te leh semiconductor supply chain siam ngheh dan tur te a tel. PM Takaichi hian Japan aṭanga sumdawng mi 100 chuang lo kalte nen business meeting an hmanpui bawk ang.