Pharmacy zirna siamṭha turin sorkar laipui hma la

Sorkar laipui chuan ram chhunga pharmacy zirna leh a kaihhnawih hna thawhna atana dan siam kengkawh leh siamṭha turin 'National Pharmacy Commission (NPC)' din a tum thu a puang a, hei hian kum 1948 sorkar dan siam 'Pharmacy Act,1948' thlaktu tur an siam dawn a ni.

Union Health Ministry chuan 'National Pharmacy Commission Bill, 2026' rawtna chu mipuite leh thuneitu hrang hrangte ngaihdan lak kawp a nih hnuah tlangzarhin, July 31 thleng hian sawisel duh leh rawtna nei te tan ngaihdan a la khawm chhunzawm dawn a ni. He hmalakna hian ram chhunga damdawi lama thiamna zirna te chu awlsam leh tlawm zawk, quality sang zawka siam a tum bawk.

He rawtna thar hnuaiah hian Commission thar chuan board pali a nei dawn a, chungte chu Pharmacy Assessment and Rating Board, Pharmacy Ethics and Registration Board, Pharmacy Education Board for Modern System of Medicine, leh Pharmacy Education Board for Indian System of Medicine and Homoeopathy te an ni dawn a, an pisa pui ber chu New Delhi-ah a awm ang.

Heng bakah hian sorkar chuan 'Pharmacy Advisory Council' a din bawk dawn a, damdawi lam thiam bikte tana chhinchhiahna 'National Register' siam a nih bakah, hna thawk thei tura fiahna 'National Exit Test (Pharmacy)' pawh tualchhungah hman tum a ni bawk. Ram danga hna thawk thei khawp tura khawvel huap thiamna neih tir chu a tum ber a ni.