PM Modi leh Japan PM Sanae Takaichi te inbia

Prime minister Narendra Modi leh India-a cham mek, Japan prime minister Sanae Takaichi te chuan nimin khan New Delhi-a Hyderabad House-ah inbiakna pawimawh tak, "Annual Summit talks" an nei. Inbiaknaah hian ram pahnihte inkara sumdawnna tihlente, semiconductor, critical minerals leh pharmaceuticals sector-a thawh dunna tihchak, leh artificial intelligence (AI) hmanga hmasawnna kawng hrang hrang thlen tawn dan turte an sawi dun.

Japan PM Sanae Takaichi hian PM Narendra Modi-a sawmna angin July 1 aṭanga July 3,vawiin thleng cham turin India a rawn tlawh a, hei hi ram hruaitu anga a vawi khat rawn zinna a ni. Nimin chawhma khan Rashtrapati Bhavan tualah a lawmna ropui taka buatsaih a ni a, chawhnu lamah ram pahnih aiawhte nen ram hruaitu pahnihte hi an inbia a ni.

Inbiakna an neih zawh hnuah External Affairs Ministry thupuangtu, Randhir Jaiswal chuan India leh Japan inlaichinna chu inrintawnna leh thil thuhmun ngaihtuahna "strategic convergence" rintlak leh nghet tak vuan chunga kal a ni tih a sawi. Ram pahnihte chu sumdawnna leh venhimna kawngah an thawh dunna dan turah 'Joint Declaration on Economic Security Cooperation' leh 'Joint Statement on Artificial Intelligence' te an tichhuak dawn bawk.