Speed Post hmanga ganja thawn kualtu man chhuak

India rama state hrang hrang 21-a 'Speed Post' leh courier service dangte hmanga ganja sem darhtu pawl lian chu Hyderabad Narcotics Enforcement Wing (H-NEW) in an man chhuak. He smugling thila a bul tumtu ber nia hriat, Satyam Misra chu Jharkhand-a Giridih district aṭangin man niin, a thawhpui mi dang pali erawh an tlan bo hman.

Hyderabad Police Commissioner, VC Sajjanar chuan ganja tawlhrutu pawl hi Jharkhand-ah inkhuarin Telangana, Maharashtra, Tamil Nadu, Karnataka leh Delhi-ahte ganja hi an thawn kual ṭhin tih a sawi. Ganja hi state hrang hrangah damdawi anga sawiin post office kaltlangin an thawn chhuak ṭhin tih hriat a ni.

An thil thawn chhuah tur WhatsApp leh social media kaltlangin chah ṭhin a ni a, pawisa pawh UPI account hrang hrang hmanga thawn luh ṭhin a ni. Nitin order 80-100 vel an dawng ṭhin a, ni khatah 'Speed Post' parcel 8 -10 vel bawr thawn chhuakin, thla khatah Rs nuai 30-35 vel an la lut ṭhin tih thuneituten an sawi.

H-NEW in Jharkhand aṭanga Hyderabad pan parcel pakhat an lo man aṭangin he thil hi man chhuah ṭan a ni. Hyderabad-a ganja leitu mi pahnih an man hnuah he pawl chet vel dan hi hriat chhuah a ni a, Mumbai lamah pawh distribution network neiin, man chhuah an nih loh nan "Mango", "Stick" leh "Flower" tihte code word-ah an hmang ṭhin.

Police-te chuan he thil hian rel leh thlawhtheihna hmanga thil thawn luh ṭhin danna kawnga venhimna fel tawk lo a tilang tih sawiin, parcel-te uluk zawka endik a nih theih nan thuneitu lam an dawr tur thu an tarlang bawk.