Hormuz-ah LNG phurh chhunzawm; Sorkar laipuiin gas hrekna hlip

West Asia buainain ziaawm lam a pan chhoh hnua Strait of Hormuz kaltlanga liquefied natural gas (LNG) phurhna lawngte a kaltlang leh tak avangin, sorkar laipui chuan thla li vel kaltaa hrekna a lo siam, ram chhunga natural gas hrekna a siam chu a hlip.

Inrinni liam ta khan Ministry of Petroleum and Natural Gas chuan hriattirna thar tichhuakin, 'Natural Gas (Supply Regulation) Order, 2026' chu an siamṭhat thu an puang a, he hriattirna tharah hian sorkarin gas sem chhuah dan a lo thununna leh khuahkhirhna hrang hrang a siamte chu nuai bo a ni tih a tarlang.

Sorkar thuchhuah chuan, West Asia boruak a ziaawm chhoh tak zel avang leh inremna tluantling siam tura inbiakna kalpui a nih hnuah, Strait of Hormuz-ah tuipui lam sumdawnna chu a pangngai leh tak avangin emergency-a gas thununna dan siamte chu a ngai leh tawh rih lo a ni, a ti.

He emergency dan khauh tak hi kumin March 9 khan 'Essential Commodities Act' tlawhchhana siam a ni a; February 28-a US leh Israel-ten Iran an beih hnu leh Iran lamin a chhanlet ve hnuah, khawvela gas phurh chhuahna hnar pawimawh 'Strait of Hormuz' chu khar a ni. Gas supply a bahlah tak vak avangin sorkar laipui chuan ram chhunga chhungkua leh mamawh zualte hnenah gas a thlen kim reng theih nan he dan hi a lo tichhuak ta a ni.

India hian tuialhthei a mamawh aṭanga 88% vel leh natural gas mamawh zat ve vel chu ram pawn aṭanga a lak luh a ni. Chumi zinga 65% vel chu West Asia aṭanga lo kal a nih avangin Hormuz buaina khan India mamawh a nghawng na hle a ni. Tunah erawh boruak a ziaawm leh tak avangin sorkar chuan gas sem chhuah dan hi a pangngai angin a kaltir zui nghal bawk.