Global Passport Index 2026-ah India 125-naah a tlahniam

Khawvel huapa passport thiltithei leh hlutna tehna, 'Global Passport Index 2026' tihchhuah tharah India chu kum hmasa lam aiin pakhatin a tlahniam a, ram 197 zingah 125-na a ni. Residency leh citizenship advisory firm 'Global Citizen Solutions' (GCS) in a tarlan danin, nikum 2025-a India dinhmun, 124-na aiin kumin hmasawn tura ngaih a nih laiin a dinhmun a tlahniam ta zawk a ni.

Kum 5 kal ta, 2021-a India hi 127-na a nih laiin, kumin hian composite score 45.1 hmuin score-ah erawh hmasawnna hmuh a ni thung. He passport index hian zin veivahna chauh thlir loin, invest theihna dinhmun leh nunphung ziarang thlengin a teh tel a ni. Report tarlan danin, tun dinhmunah India passport hmang hian ram 26-ah visa tel loa zin theih a ni a, heng zingah hian Bhutan, Nepal, Jamaica, Macau leh Barbados-te an tel.

Khawvel ram lian leh thiltithei zual, United States, United Kingdom, Germany, France, China leh UAE-ah te erawh chuan India khua leh tuite tan visa lak hmasak a la ngai thung a ni. India hi a ram len phu lo khawpa hnuaihnung, Namibia, Philippines leh Uzbekistan-te hnungah a awm pha chauh a ni.

Passport thiltithei ber thlannaah hian Europe ramte an chungnung hle a, Sweden chu khawvela passport thiltithei ber niin, Switzerland leh Finland-ten an dawt a ni. Asia ram zingah Singapore chauh top 10-ah a tel pha a, 10-na a ni. India ṭhenawm ram zingah China chu 104-na niin Bangladesh (166), Nepal (164) leh Pakistan (188) te erawh India aiin an hniam ve thung.