PM Modi-a ram pathum tlawhin India Act East Policy tichak dawn

Prime minister Narendra Modi chu nimin khan ram pathum - Indonesia, Australia leh New Zealand tlawh kual turin a zin chhuak a, ni ruk a cham ang. PM chuan a zinna hian India 'Act East Policy' leh 'MAHASAGAR Vision' te a tichak zual dawn tih a sawi.

Prime Minister chuan July 6-8 inkar hian Indonesia president Prabowo Subianto sawmna angin Jakarta a tlawh hmasa ber dawn tih a sawi a, he a tlawhna hian kum 2018-a bul an lo ṭan tawh, 'Comprehensive Strategic Partnership' chu a tinghet zual dawn a ni. Jakarta-ah hian India mi awmte hmaah thu a sawi dawn bakah Yogyakarta-a Prambanan Temple hmun pawh a tlawh ang.

Indonesia a tlawh zawh hian Australia prime minister Anthony Albanese-a sawmna angin Melbourne-ah a kal leh ang a, hetah hian ram pahnih inkara venhimna, sumdawnna, zirna leh technology chungchangte sawi ho a ni ang. Sumdawng hruaitute nen 'India-Australia CEOs Forum'-ah an tel ve nghal dawn bawk.

PM hian a zin program tawpna ber atan New Zealand prime minister Christopher Luxon-a sawmna angin Auckland a tlawh leh dawn a, he intlawhna hi kum 40 hnua India prime minister-in New Zealand a tlawh lehna hmasa ber tur a ni. Ram pahnihte inkara sumdawnna leh venhimna tihchak zual nan New Zealand hotu liante nen inbiakna an nei ang.