Ministry of Cooperation kum 5 tlin pualin project hrang hrang tlangzarh

Union home leh cooperation minister Amit Shah chuan nimin khan New Delhi-a Bharat Mandapam-a Ministry of Cooperation-in kum nga a tlinna '5th Foundation Day' lawmna inkhawm hmanpuiin, ram chhunga cooperative sector tichaktu tur leh tihmasawntu tur project thar eng emaw zat a tlangzarh.

Ministry of Cooperation chuan kum nga an tlin lawmna pui ber chu nimin khan an hmang a ni. Amit Shah chuan prime minister Narendra Modi-a hmathlir 'Sahakar Se Samriddhi', Cooperative kaltlanga hmasawnna tihhlawhtlin nana hma lak chhunzawm a nih tur thu a tarlang. He ministry din a nih hnu hian cooperative movement chu a hma aia rintlak, ngelnghet leh thiamna thar nena thuam a nih tawh thu a sawi.

Hun hman piah lamah hian Amit Shah chuan 'World's Largest Grain Storage Scheme' hnuaiah buh leh thlai thar dahkhawmna hmun, 'godown' 135 chu tlangzarhin, godown dang 85 a hawng bawk a, hemi piah lamah hian godown thar 47 sakna tur lungphum a phum bawk. Hemi bakah hian thlai chi ṭha siamna tur, tissue culture facility thar leh Urban Cooperative Bank-te tana hman ṭangkai tur conversational AI platform 'Sahakar Sahyogi' bakah centralized core banking platform 'Sahakar CBS' te pawh a tlangzarh nghal bawk.

Minister chuan cooperative sector chu agriculture, dairy, leh fertiliser chauh ni loin, sector hrang hrangah zauh zel a ni tih sawiin, 'Bharat Taxi' cooperative ride-hailing platform pawh khawpui 500-ah zauh a nih tur thu leh, hmasawn nan cooperative life insurance company thar din a nih tur thu a puang nghal bawk. He hunah hian e-PACS Primary Agricultural Credit Societies 50,000 chu digital khawvel nena thlunzawm a ni bawk a, hei hian buaina awm ṭhin leh thil fel lo tam tak a tibo dawn tih a sawi bawk a ni.